aTp 8:7-9
bJob 18:19; Eze 31:4
cJer 42:10; Hos 12:1
dJer 52:3; Eze 12:8
e1Kh 29:24; Eze 12:13
fJer 7:9; Eze 12:14
gPh 96:12

Ezekiel 17

Muvanlai Nih le Lenggui Khat

1TOPA thu kei tungah hong tunga: 2“Mihing tapa aw, tehkakna khat gelhkhia inla Israel innkuante tungah gentehna khat gen in. 3Amaute kiangah, ‘Hih in Thupipen TOPA gen ahi hi: Muvanlai golpi, a kha za mahmah in a khavengte sau a, a mel tuamtuamin a gial bialbual khat Labanon ah va tu hi. Tamtak dawn khat tuah a, 4a dawnngek sutanin sumbukte gamah lenpih a, sumbukte khuapi ah a suan hi.

5 “‘Amah in na gamua khaici pawlkhat pua in lei hoihna ah tuh hi. Nahkai sing bangin tui tamna munah suana, 6pokhia-in zaam a, ahi hangin azung a nuai-ah a om hi. Tua ciangin lenggui suak a, a hiang mengkhia in a teh pha mahmah hi. a

7 “‘Ahi hangin muvanlai dang khat, gol mahmah in a kha za deda a, a mul pha mahmah khat a om hi. Lenggui in a kisuanna mun panin ama lamah zungkha a, tui a ngah nadingin a hiangte ama lamah a zaam hi. 8Tua lenggui a hiang mengin agah gah a, lenggah hoih a suak dingin lei hoihna mun tui tamna gei-a kisuan ahi hi,’ ci in. b

9 “Amaute tungah, ‘Hih in Thupipen TOPA gen ahi hi: A khanpha zo diam? A vul nadingin zungbawhin a gahte zutkhiat loin om ding ahi hiam? A mengthak khempeuh a vulgawp ding hi. Tua lenggui botkhia dingin mi thahat ahikeh mi tampi kisam lo ding hi. 10A mun dangah kisuan leh zong a gahpha zo ding hiam? Nisuahna huih in a mut ciangin vulgawp lo ding hiam - a kisuanna mun a pona ah a vulgawp ding hi,’ ci-in gen in,” hong ci hi. c

11 Tua ciangin TOPA thu kei tungah hong tunga, 12“A lehdo thei innkuante tungah, ‘Hih nate a khiatna na thei uh hiam?’ ci-in dong in. Amaute tungah: ‘Babylon kumpipa Jerusalem ah pai-a, a kumpipa le a uliante kaikhia-in Babylon ah tonpih kik hi. 13Tua ciangin kumpipa innkuan sung pan khat la-in thuciam bawlpiha a kiciamsak hi. Gam makaite zong paikhiatpih mang hi. 14Tua pen a kumpi gam kiamin ding kik zo nawn lo-a a omlai sunte in a thuciam uh a zuih nading uh deihna ahi hi. 15Ahi hangin kumpipa in amah lehdo a, Egypt ah palai sawlin sakol le galkap tampi a ngensak hi. A lawhcing na diam? Tua banga nasempa a suakta zo ding hiam? A thuciam palsat napi suakta veve ding ahi hiam? d

16 “Thupipen TOPA nuntakna ka lo hi, a kamciam pelh a, a thuciam uh a palsatpa, amah kumpi tokhom tungah a tusakpa’ gam Babylon ah amah si ding hi. 17Pharaoh in mi tampi nuntakna siatsak nadingin dum toin kan bawla a thahat a galkap honpite tawh a kuan hangin ama gal a zawhsak tuan kei hi. 18Amah ciampelin thukhun palsat ahi hi. Thuciamna bawl khin napi hihte khempeuh sem ahi manin a suakta peuhmah kei ding hi. e

19 “‘Tua ahi ciangin hih in Thupipen TOPA gen ahi hi: Ka nuntakna ka lo hi, ka thuciam a simmawhna le ka thukhun a palsatnate ama lutungah ka tusak ding hi. 20Amah siahna-in ka len ka zaak dinga ka thangah a awk ding hi. Amah kei tungah muanhuai lo ahi manin Babylon ah paipihin tua lai-ah thu sitin thu ka khen ding hi. 21A taikek ama galkapte khempeuh namsau in tuk ding uh a, a omlai sunte huih lakah a kithehthang ding uh hi. Tua ciangin keimah TOPA gensate na thei ding uh hi. f

22 “‘Hih in Thupipen TOPA gen ahi hi: Keimah in tamtak sangpi dawnngek khat la-in ka suan ding hi; adawn panin angumngeek khat khiaktanin mual sangpi dawn khatah ka suan ding hi. 23Israel mual sangpente dawnah ka suan ding hi; a hiang meng dinga, agah gahin tamtak lianpi a suak ding hi. Vasa namkim in a tungah bu tom ding uh hi; amaute ahiang liim nuai-ah a om ding uh hi. 24Gam sunga sing khempeuh in, keimah TOPA in sing sangte niamsakin, sing niamte ka sansak lam, singhingte keusakin singkeute ka hinsak lam a thei ding uh hi.

“‘Keimah TOPA in ka gensa hi-a ka gen bangin ka sem ding hi, ci hi,’ ci-in gen in,” hong ci hi. g
Copyright information for ZomZIV